Dëse Feature ass Deel vun enger Serie iwwer d’Europawahlen déi ech fir RTL Radio Lëtzebuerg produzéiert hunn. De Beitrag ass den 30. Abrëll iwwerdroe ginn. De Link ass hei.

Den Trilog sinn d’Dräiergespréicher tëschent dem Europäesche Parlament, der Europäescher Kommissioun, an dem Europäesche Conseil, no der Propositioun vun enger neier Direktiv. Et handelt sech ëm eng Tripartite an där all Partner dee selwechte Pouvoir huet, an déi zesumme kënnt wann de Conseil net mat den Amendementer vum Parlament d’accord ass. D’Kommissioun mécht d’Médiatioun.

Dësen Trilog kann immens vill Ronnen hunn, a laang daueren, mee soubaal wéi sech Conseil a Parlament op een Text eengegen, kënnen déi zwou Parteien quasi näischt méi um Text änneren. Dat heescht dass national Parlamenter, dorënner d’Chamber zu Lëtzebuerg, kaum ee Matsproocherecht huet. Den Trilog ass eng Verhandlungsronn déi net ëffentlech zougänglech ass an dee net mat Rapport’en noverfollege léist wéi de Schlusstext zesumme komm ass. Den Europäeschen Ombudsman huet dat am Joer 2016 wéinst Manktum un Transparenz kritiséiert.